Тошкентдаги Халқаро конгресс марказида маданият, санъат ва адабиёт соҳаси ходимларига давлат мукофотларини тантанали топшириш маросими бўлиб ўтди. Тадбирда президент Шавкат Мирзиёев иштирок этди ва нутқ сўзлади.
Давлат раҳбари ўз чиқишида мамлакат қудрати нафақат иқтисодий кўрсаткичлар, балки унинг маънавияти, маданияти ва санъати билан ҳам белгиланишини алоҳида таъкидлади. Янги Ўзбекистонни барпо этишда жамиятда миллий руҳни мустаҳкамлаётган зиёлилар ҳамда креатив соҳа вакилларининг ўрни беқиёс экани қайд этилди.
Жорий йилда соҳанинг 167 нафар илғор вакили юксак давлат мукофотлари билан тақдирланди. Улар орасида узоқ йиллар самарали меҳнат қилган ёзувчилар, хонандалар, театр ва кино намояндалари, бахши ва аскиячилар, ҳунарманд ҳамда музей ходимлари бор.
Эътиборли жиҳати, бугунги кунда орамизда бўлмаган 24 нафар адабиёт ва санъат дарғаларининг хотирасига эҳтиром кўрсатилиб, улар ушбу мукофотлар билан вафотидан сўнг тақдирланди. Президент ўз нутқида ўтиб кетган ижодкорларнинг хизматларини муносиб эътироф этиш халқимизнинг маънавий бурчи эканини билдирди.
Маросимда Шавкат Мирзиёев мукофот соҳибларига фахрий унвон, орден ва медалларни тантанали равишда топширди. Ўз навбатида, ижодкорлар яратилган кенг шароитлар ва юксак эътибор учун давлат раҳбарига миннатдорлик билдиришди.
