Ўзбекистонда аҳолининг ўртача умр кўриш давомийлиги сўнгги 15 йилда 3,6 йилга узайди. 2010-йилда 72,8 йилни ташкил этган мазкур кўрсаткич 2025-йилга келиб 76,4 йилга етган.
Маълумотларга кўра, 2010–2025-йиллар давомида ўртача умр кўриш давомийлиги тахминан ҳар тўрт йилда бир йилга ошган. 2020-йилда қайд этилган пасайишдан сўнг эса кўрсаткич 2021–2025-йилларда изчил ўсиб борган. Натижада 2025-йилда сўнгги 15 йилдаги энг юқори даража кузатилган.
Аёллар ва эркаклар ўртасида ҳам умр кўриш давомийлиги ошган. Хусусан, аёлларда бу кўрсаткич 2010-йилдаги 74,7 йилдан 2025-йилда 77,9 йилга етган. Эркакларда эса 71 йилдан 75 йилга кўтарилган.
Шундай қилиб, 15 йил ичида эркакларнинг ўртача умр кўриш давомийлиги 4 йилга, аёлларники эса 3,2 йилга узайган.
Шу билан бирга, аёллар ва эркаклар ўртасидаги умр кўриш давомийлиги фарқи ҳам қисқарган: 2010-йилдаги 3,7 йиллик тафовут 2025-йилда 2,9 йилни ташкил этган.




