Ўзбекистонда атом электр стансиялари реактор қурилмаларининг ядровий хавфсизлиги бўйича янги қоидалар давлат рўйхатидан ўтказилди. Бу ҳақда Адлия вазирлиги хабар берди.
5-ноябрда рўйхатдан ўтказилган ҳужжатда АЕС қурилиши, эксплуатацияси ва аварияларнинг олдини олишга қаратилган талаблар белгиланган.
Унга кўра, қурилиш бошланишидан олдин реакторнинг хавфсизлик тизимлари лойиҳалаштирилиши, аварияларнинг аҳоли саломатлиги ва атроф-муҳитга эҳтимолий таъсири ўрганилиши шарт.
Шунингдек, хавфсизлик тизимлари мунтазам синовдан ўтказилади, реактор қуввати эса босқичма-босқич оширилади. Ходимлар учун авария ҳолатларида ҳаракат қилиш бўйича махсус машғулотлар ҳам ташкил этилади.
Эслатиб ўтамиз, Шавкат Мирзиёев 16-октябр куни инвесторлар билан учрашувда Ўзбекистонда биринчи АЕС қурилиши бошлангани, иккинчи ва учинчи атом электр стансияларини қуриш ҳам режалаштирилаётганини маълум қилган эди.
