Ўзбекистонда фирибгарликда гумонланиб, халқаро қидирувга берилган яна бир фуқаро Туркияда қўлга олинди. У мамлакатдан депортация қилинган.
Бу ҳақда Ўзбекистоннинг Истанбул шаҳридаги Бош консулхонаси хабар берди.
Тергов маълумотларига кўра, Н.Р. фуқаролар ишончига кириб, алдаш йўли билан уларнинг кўп миқдордаги мол-мулкини қўлга киритганликда гумонланмоқда. Унга нисбатан Жиноят кодексининг 168-моддаси 3-қисми (фирибгарлик) билан жиноят иши қўзғатилган.
Қидирув ишлари Ўзбекистонда бошланган. Ўзбекистон ва Туркия ички ишлар вазирликлари ҳамкорлигида ўтказилган тезкор-қидирув тадбирлари натижасида унинг қаердалиги аниқланиб, қўлга олинган.
Эслатиб ўтамиз, бундан аввал халқаро қидирувда бўлган собиқ давлат ташкилоти ходими ҳам Туркиядан Ўзбекистонга қайтарилгани хабар қилинганди. У Хоразм вилоятидаги Бандликка кўмаклашиш тизимида масъул лавозимда ишлаган даврида давлат маблағларини талон-торож қилиш ва ҳужжатларни қалбакилаштиришда гумонланмоқда.




