Toshkent shahri va Toshkent viloyati hududida shamol deyarli kuzatilmayapti. Xususan, kechasi (+3…+5°C) va kunduzi (+11…+15°C) oʻrtasidagi keskin harorat farqi ertalabki tuman va harorat inversiyasi shakllanishiga sabab boʻldi. Ayni damda shahar nisbatan salqin havo massasi taʼsiri ostida boʻlib turibdi, yogʻingarchilik kutilmayapti.

Ushbu meteorologik omillar taʼsirida atmosferaning yerga yaqin qatlamlarida havo almashinuvi sekinlashdi, bu esa ifloslantiruvchi moddalar tarqalishini cheklamoqda.

Shu munosabat bilan hozirgi vaqtda Toshkent shahri va Toshkent viloyatida atmosfera havosida mayda dispers zarrachalar (PM2.5 va PM10) konsentratsiyasining oshishi kuzatilmoqda.

Sinoptiklar prognozlariga koʻra, 2-martdan boshlab kutilayotgan yogʻingarchiliklar havo sifati koʻrsatkichlarining yaxshilanishiga olib keladi.