Қашқадарё вилоятининг Яккабоғ туманидаги хусусий завод рухсатномасиз кўмир қазиб олиш ва сотишга уринган. Шунингдек, конга йўл қуриш жараёнида 33 туп дарахт ва қарийб 3 минг туп бута илдизи билан қўпорилган.
Вилоят ИИБ маълумотига кўра, «Мега Асиа Салт анд Қуартз» заводи мансабдорлари фақат геологик ўрганиш учун берилган рухсатнома асосида Зармас кўмир кондан ноқонуний қазиб олиш билан шуғулланган.
Тезкор тадбирда корхона ходими 500 тонна кўмирни 350 миллион сўмга сотишга келишиб, келишилган пулдан 50 миллион сўмни олаётган вақтда ашёвий далиллар билан ушланган.
Текширувда конга йўл қуриш баҳонасида 24 туп Зарафшон арчаси, 9 туп учқат дарахти ва қарийб 3 минг туп бута нобуд қилингани аниқланган. Табиатга етказилган зарар 480 миллион сўмдан ошган.
Ҳолат юзасидан корхона раҳбари ва бошқаларга нисбатан Жиноят кодексининг 229-моддаси ҳамда 198-моддаси 3-қисми билан жиноят иши қўзғатилган. Ҳозирда дастлабки тергов ҳаракатлари олиб борилмоқда.
