Turkiyada zo‘ravonlik va majburiy mehnat holatlariga duch kelgan 17 yoshli O‘zbekiston fuqarosi vatanga qaytarildi. Bu haqda Migratsiya agentligi xabar berdi. Ma’lum qilinishicha, voyaga yetmagan fuqaro o‘qish bahonasida Turkiyaga olib borilgan. U yerda majburiy nikohga undash, jismoniy zo‘ravonlik va majburiy mehnat holatlariga duch kelgan. Shundan so‘ng u O‘zbekistonning Istanbuldagi Bosh konsulxonasiga murojaat qilgan.

Shuningdek, uning Migratsiya jamg‘armasi mablag‘lari hisobidan O‘zbekistonga qaytarilishi ta’minlangan. Migratsiya agentligiga ko‘ra, voyaga yetmagan fuqaroning xavfsizligi, ijtimoiy-huquqiy va psixologik himoyasini ta’minlash masalalari tegishli tashkilotlar nazoratiga olingan.