Тошкент вилоятининг Чирчиқ шаҳри ва Қибрай туманида ўтказилган тезкор тадбирларда жами 4,7 кг гиёҳвандлик воситалари мусодара қилинди.

Айрим ҳолатларда вояга етмаган қизлар наркотик моддаларни тарқатишга жалб қилинган. Ички ишлар вазирлиги хабарига кўра, Чирчиқда 2006-йилда туғилган қиз ва унинг вояга етмаган шериги 41 дона ўрамдаги синтетик гиёҳвандлик воситаларини тарқатаётган вақтда ушланган.

Вояга етмаган қиз ижарада яшаётган уйда эса сотиш мақсадида сақланаётгани айтилган 1 кг 259 грамм синтетик гиёҳвандлик воситаси аниқланган. Тезкор тадбирлар давомида Чирчиқда яна бир шахс вояга етмаган қизни гиёҳвандлик воситалари савдосига жалб қилгани маълум қилинган. ИИВга кўра, улар яна бир аёл билан бирга 150 грамм синтетик гиёҳвандлик воситасини яширин жойларга қолдириш усулида тарқатаётган пайтда ушланган.

Аёлнинг яшаш жойидан 2 кг 850 грамм мефедрон, 200 грамм алфа-ПВП, 200 грамм героин, шунингдек, зип-пакетлар, изоленталар ва тарозилар топилгани билдирилган. Қибрай туманида ҳам интернет орқали фаолият юритувчи наркодўконга алоқадор деб кўрсатилган шахслар ушланган. Улар тўртта манзилга жами 200 дона ўрамдаги гиёҳвандлик воситаларини яширишга урингани айтилмоқда. Улар Сирдарё, Фарғона ва Наманган вилоятларида яшовчи йигитлар бўлиб, орасида талабалар ҳам бор.

Тезкор тадбирлар якунида жами 4 кг 700 грамм гиёҳвандлик воситалари мусодара қилинган. Вазирлик ҳисоб-китобига кўра, шу орқали 245 минг дона бир марталик дозанинг муомалага чиқарилиши олди олинган. Интернетдаги наркодўкон фаолиятига алоқадор бошқа шахслар ва гуруҳларни аниқлаш бўйича тезкор тадбирлар давом этмоқда.