Суд қарорига кўра, ўтган йилнинг 23-сентябр куни Тошкент шаҳар Мирзо Улуғбек тумани давлат солиқ инспексияси ходимлари Хайрулла Асадовга тегишли китоб дўконида текширув ўтказган.

Ўтказилган текширув натижасига кўра, Асадов харидорга 20 минг сўмга харид чеки бермагани ва кунлик савдодан тушган 20 минг сўм пулни онлайн назорат касса машинаси хотирасига киритмагани, шу билан биргаликда ҳужжатларсиз фаолият юритаётгани аниқланган.

Суд жараниёда Хайрулла Асадов қилмишидан пушаймон эканлигини, бу каби ҳаракатларни бошқа содир этмаслигини айтиб, суддан енгиллик сўраган.

ЖИБ Мирзо Улуғбек туман судининг 2026-йил 6-январдаги қарори билан Асадов МЖТКнинг 176-моддаси 1-қисмида назарда тутилган ҳуқуқбузарлигини содир қилган деб топилиб, унга БҲМнинг 5 баравари (2 млн 60 минг сўм) миқдорида жарима солинган.

Шунингдек, Хайрулла Асадовнинг нархи 1 млн 520 минг сўм бўлган 3 турдаги 100 дона китоби тегишли тартибда мусодара қилинган.

Тошкент шаҳар судлари мазкур ҳолат юзасидан муносабат билдирди:

“Маънавият ва савдо ўртасида фарқ бор. Китоб – маънавият воситаси экани тўғри, бироқ у сотувда товар ҳисобланади, сотувчи эса савдо қоидаларига риоя этиши керак”, — дейилади муносабатда.