Самарқанд вилояти Бюро мажбурий ижро (БПИ) бошқармаси матбуот хизмати маълум қилишича, меҳмонхона биноси онлайн-ауксион орқали сотувга чиқарилган.
Маълум қилинишича, Самарқанд шаҳар фуқаролик ишлари бўйича судининг жорий йил 28-июлдаги қарорига асосан, "Т.Л." МЧЖ ва якка тартибдаги тадбиркор Т.З.дан "Туронбанк" фойдасига солидар тартибда кредит қарздорлигини ундириш белгиланган. Қарзнинг умумий миқдори 1 миллиард 71 миллион 269 минг 206 сўмни ташкил этган. Шунингдек, улардан 41 минг 200 сўм почта харажатларини ҳам ундириш белгиланган.
Суд қарорида ундирув фуқаро Х.З. га тегишли бўлган, Самарқанд шаҳрининг "Боғи Темур" маҳалласи Амир Темур кўчасида жойлашган меҳмонхона биносига қаратилиши кўрсатилган. Мазкур кўчмас мулк 3 миллиард 250 миллион сўмга баҳоланган.
Шу тариқа, меҳмонхона биноси онлайн-ауксион орқали сотувга қўйилган. Уни сотишдан тушадиган маблағлар банк олдидаги қарздорликни қоплашга йўналтирилади.
