Кичик ва микро ГЕС қурмоқчи бўлган тадбиркорларга лойиҳа, ускуна, қурилиш ва молиялаштиришгача бўлган жараёнлар бўйича амалий кўмак таклиф этилмоқда.

Бугун, 11-август куни Тошкент вилоятининг Бўстонлиқ туманидаги “УзҲйдроПоwер” заводида “Ўзбекгидроенерго” АЖ Бошқарув раиси Ислом Абдураҳмонов иштирокида тадбиркорлар билан очиқ мулоқот бўлиб ўтди.

Унда гидроенергетика соҳасини ривожлантириш, кичик ва микро ГЕСлар қурилишини кенгайтириш ҳамда давлат-хусусий шериклик асосида хусусий сектор иштирокини ошириш масалалари муҳокама қилинди.

Мулоқотда “Ўзбекгидроенерго” тизимидаги “Гидропроект” АЖ, “Туронбанк” мутасаддилари ҳамда 20 нафарга яқин тадбиркор иштирок этган. Тадбир давомида тадбиркорларга кичик ва микро ГЕСлар учун ҳудудларни танлаш, лойиҳалаштириш, техник ечимларни ишлаб чиқиш, гидроагрегат, турбина ва генераторларни танлаш ҳамда етказиб бериш, қурилиш-монтаж ишларини ташкил этиш ва обектни ишга туширишгача бўлган жараёнлар тушунтирилди.

Шунингдек, лойиҳа-смета ҳужжатларини тайёрлаш, техник талаблар, ускуналарни танлаш ва молиялаштириш масалалари бўйича тадбиркорларнинг саволларига мутахассислар томонидан жавоб берилди.

“Туронбанк” вакиллари эса имтиёзли кредитлардан фойдаланиш имкониятлари, молиялаштириш шартлари ва зарур тартиб-таомиллар ҳақида маълумот берди.

“Ўзбекгидроенерго” АЖ хусусий сектор вакилларининг ташаббусларини қўллаб-қувватлаш, лойиҳаларни бошланғич босқичдан тўлиқ ишга туширишгача бўлган жараёнда ташкилий, техник ва амалий кўмак кўрсатишга тайёрлигини билдирди.

Мулоқот доирасида “УзҲйдроПоwер” заводининг ишлаб чиқариш имкониятларига ҳам алоҳида эътибор қаратилди. Хитойнинг “Зҳежианг Жинлун Элеcтромечаниc Cо., Лтд.” компанияси билан ҳамкорликда ташкил этилган корхонада қуввати 1 кВтдан 40 МВтгача бўлган гидроагрегатлар, турбиналар, генераторлар, сув насос агрегатлари ҳамда сув омборлари учун металл конструксиялар ишлаб чиқарилади.

Мазкур ишлаб чиқариш қуввати кичик ва микро ГЕС лойиҳаларини маҳаллийлаштирилган замонавий ускуналар билан таъминлаш имкониятларини кенгайтириши таъкидланди. Очиқ мулоқот якунида тадбиркорларнинг таклиф ва мурожаатлари кўриб чиқилиб, кўтарилган масалалар бўйича амалий ечимлар белгиланди ва масъулларга тегишли вазифалар юклатилган.