Таълим тизими — шунчаки битта идора ёки ташкилот эмас. У минглаб ўқувчилар, ота-оналар, ўқитувчилар, мактаб директорлари ва боғча раҳбарларининг кундалик ҳаёти, таълим-тарбия жараёни ва ҳужжатлар айланмаси билан бевосита боғли муҳим тизимдир.

Агар бўлимнинг хизмат хоналари, жумладан қабулхона ҳам муҳрланган бўлса, жамоатчиликда қатор ҳақли ва кечиктириб бўлмайдиган саволлар туғилмоқда. Хоналар муҳрланган бўлса, у ерда фаолият юритган ходимлар ҳозир қаерда ва қай тартибда ишламоқда, уларнинг кундалик вазифалари ва ижро интизоми тўхтаб қолмадими? Ота-оналар, ўқитувчилар ва муассаса раҳбарлари ўз мурожаатлари бўйича энди қаерга боришлари керак? Мактаб ва боғчалардан келадиган топшириқлар ва ташкилий ишлар ким томонидан қабул қилиниб, кўриб чиқиляпти?

Энг асосий масалалардан бири — бу вазиятнинг келиб чиқиш сабабларидир. Агар қарздорлик ҳақиқатан ҳам мавжуд бўлса, у қайси харажатлар ҳисобидан ва қачон пайдо бўлган? Унинг миқдори қанча ва нега вазият хоналар муҳрланиши даражасига етгунча бартараф этилмаган? Муаммони шу даражагача олиб келганлик учун ким масъул?

Ҳозирча ушбу маълумотлар тўлиқ расмий тасдиқланмаган бўлиб, ҳеч қайси томонга бевосита айблов қўйилмайди. Бироқ соҳанинг жамият учун қанчалик муҳимлигини инобатга олиб, масъул идоралардан — Навоий вилояти Мактабгача ва мактаб таълими бошқармаси, МИБ ҳамда шаҳар ҳокимлигидан ушбу вазият, қарздорлик манбаи, ходимларнинг ҳозирги иш тартиби ва фуқаролар қабули юзасидан тезкор, очиқ ва расмий муносабат кутиб қоламиз.