Аввалроқ Эффеcт.уз Тошкентда “ДНА Моторс” МЧЖ раҳбари, Янгиҳаёт туман кенгашининг собиқ депутати Наргис Саидназирханова фирибгарликда гумонланиб қамоққа олингани ҳақида хабар берган эди.

Маълум қилинишича, у Жиноят кодексининг 168-моддаси (фирибгарлик) билан айбланмоқда. Тергов маълумотларига кўра, Саидназирханова хизмат мавқеидан фойдаланиб, фуқароларнинг ишончини суиистеъмол қилган ҳолда пул маблағларини қўлга киритган. Шунингдек, у бир қатор мижозларга Хитойдан электромобил олиб келиб беришни ваъда қилиб, улардан пул олгани айтилмоқда.

Аввалроқ Наргис Саидназирханова автосалон фаолияти юзасидан Эффеcт.узъга изоҳ бериб, автомобилларни етказиб беришда кечикишлар мавжудлигини тан олган ва мижозларни алдамасликка кафолат берган эди.

“Айрим кечикишлар обектив ва субектив сабабларга кўра юз беради. Бу ҳолат шартномада ҳам кўрсатилган”, — деган эди у.

Очиқ маълумотларга кўра, “ДНА Моторс” компанияси сўнгги тўрт йилдан буён хориждан электромобиллар олиб келиш билан шуғулланиб келган. Компаниянинг 42,5 фоиз улуши Наргис Саидназирхановага, 57,5 фоизи эса Саидамил Саидназирхановга тегишли.

Айтилишича, жамият фаолиятидан жабрланганлар сони 50 нафардан ортиқ бўлиши мумкин. Шунингдек, Саидназирхованинг депутатлик фаолияти билан боғлиқ ҳолатлар юзасидан ҳам қарийб 10 нафар фуқаро тергов органларига мурожаат қилган.

Айни пайтда Тошкент шаҳар ИИББ ҳузуридаги Тергов бошқармаси томонидан МЧЖ мансабдор шахсларига нисбатан қўзғатилган жиноят иши бўйича дастлабки тергов ҳаракатлари якунланган. Иш айблов хулосаси билан Тошкент шаҳар прокуратураси орқали судга юборилмоқда.

Тергов давомида жамият раҳбари Наргис Саидназирхановага бир нечта эпизодлар бўйича айб эълон қилиниб, унга нисбатан қамоққа олиш тарзидаги эҳтиёт чораси қўлланган.

Шунингдек, жамият раҳбари ўринбосарлари ҳам жиноят иши доирасида жавобгарликка тортилган:

— Фазлитдин Зияевга (аввал “Адолат” СДП марказий аппаратида бошқарма бошлиғи бўлиб ишлаган) нисбатан ЖКнинг 168-моддаси 4-қисми “а” банди билан айб эълон қилиниб, қамоқ эҳтиёт чораси қўлланган.

— Жамолиддин Мирсалиховга нисбатан ҳам худди шу модда билан сиртдан айб эълон қилиниб, унга нисбатан сиртдан қамоққа олиш тарзидаги эҳтиёт чораси белгиланган. Катта эҳтимол билан у, Ўзбекистондан чиқиб кетган.