Korrupsiya yoki ogʻir jinoyatlar haqidagi murojaatlarga eʼtibor berilmasa, ammo bu haqda xabar bergan jurnalist yoki bloger tuhmatda ayblansa — bu adolatmi?

Kimnidir yirik korrupsiya yoki boshqa jinoyatlarga aloqadorligi haqidagi murojaatlarga lozim darajada eʼtibor qaratilmasa, bu jamiyatda jiddiy savollarni tugʻdiradi.

Ayniqsa, bunday holat haqida ommaviy axborot vositalari xabar berganidan keyin, qonunbuzar shaxs taʼsir doirasi keng boʻlgani sababli javobgarlikka tortilmasa, aksincha xabar bergan shaxs tuhmat yoki yolgʻon maʼlumot tarqatishda ayblansa, bu holat adolat prinsiplariga zid koʻrinishi mumkin.

Korrupsiya yoki jinoyatlar haqidagi murojaatlar avvalo xolis va shaffof tekshiruvdan oʻtkazilishi, faqat shundan keyingina huquqiy xulosa berilishi lozim. Jamiyatda qonun ustuvorligini taʼminlash uchun har qanday daʼvo yoki ayblovlar ochiq va adolatli tarzda koʻrib chiqilishi muhim ahamiyatga ega.

Maʼlumot oʻrnida, Toshkent shahrining Uchtepa tumanidagi Uchtepa City qurilish obyektidan jabrlangan fuqarolar murojaatini yoritgan Effect.uz rahbari Akmal Eshonxonov Toshkent shahar IIBB tergovchisi tomonidan idoraga chaqirilgan. Tergovchi mazkur chaqiruv sababini ish boʻyicha raport rasmiylashtirilgani bilan izohladi.

Mazkur masala Uchtepa City qurilish obyektidan jabrlangan fuqarolar murojaati bilan bogʻliq holatlarni yoritish ortidan kelib chiqqan.