Мурожаат муаллифининг айтишича, 2021-йилда унга Тошкент туманида жойлашган 1,05 гектар ер майдони улуш асосида таклиф қилинган. Ушбу ерда фаолият юритаётган фермер хўжалиги масъулияти чекланган жамиятга айлантирилиши, у эса жамият улушдори сифатида мулкка эгалик қилиши ваъда қилинган.
Шу асосда мурожаатчи 535 минг АҚШ доллари маблағини топширганини маълум қилади.
Аммо, унинг сўзларига кўра, ордан беш йил ўтиб ҳам:
ер майдони расман берилмаган,
улушдорлик расмийлаштирилмаган,
топширилган пул тақдири ҳам ноаниқ қолган.
Қуриш мумкин эмас деган ерда уй қандай пайдо бўлди?
Мурожаатчи бир неча бор давлат идораларига мурожаат қилган. Расмий жавобларда эса ушбу ер Президент фармонига кўра суғориладиган қишлоқ хўжалиги ери экани, шу сабабли унда қурилиш ишларини амалга ошириш мумкин эмаслиги айтилган.
Бу ҳолат ҳатто Олий суд қарорларида ҳам тасдиқлангани маълум қилинган.
Бироқ бу ерда энг катта савол айнан шу нуқтада пайдо бўлади.
Чунки бугун ушбу ҳудудда кўп қаватли турар-жой биноси қад кўтариб тургани айтилмоқда.
Шунда табиий савол туғилади:
Агар бу ерда қурилиш мумкин бўлмаган бўлса, у ҳолда кўп қаватли уй қандай қурилди?
Ёпилган ишлар ва жавобсиз қолган саволлар
Мурожаатчи айтишича, у бир неча бор:
ички ишлар органларига,
прокуратурага,
бошқа тегишли идораларга мурожаат қилган.
Унинг таъкидлашича, айрим ҳолатларда ишлар турли моддалар асосида тўхтатилган.
Шунингдек, мурожаатда:
сохта ҳужжатлар тайёрлангани,
улушдорликдан чиқаришга доир аризалар пайдо бўлгани,
айрим текширувлар якунига етмагани ҳақида ҳам иддаолар билдирилмоқда.
Эффеcт.уз таҳририяти мазкур ҳолат бўйича мурожаатчининг позициясини ва тақдим этилган ҳужжатларни ўрганмоқда.
Бу ерда гап фақат пул ҳақида эмас
Бу воқеада масала фақат бир инсоннинг 535 минг доллари ҳақида эмас.
Бу ерда гап ер муносабатлари, давлат қарорлари ва назорат тизими қандай ишлаётгани ҳақида кетмоқда.
Агар бир томондан ерда қурилиш тақиқланган бўлса, иккинчи томондан ўша ерда турар-жой қурилиши қандай амалга оширилгани жамоатчилик учун тушунтириш талаб қилади.
Расмий идораларга мурожаат
Мазкур ҳолат юзасидан аниқлик киритиш мақсадида Эффеcт.уз таҳририяти қуйидаги идоралардан расмий муносабат билдиришларини сўрайди:
— Тошкент тумани ҳокимлиги
— Кадастр органлари
— Қурилиш ва уй-жой коммунал хўжалиги соҳаси мутасаддилари
— Прокуратура органлари
Айниқса қуйидаги саволлар юзасидан жавоблар муҳим:
Ер майдонининг ҳозирги ҳуқуқий мақоми қандай?
Қурилиш ишлари қайси қарор ва ҳужжатлар асосида амалга оширилган?
Мурожаатчининг 535 минг АҚШ доллари бўйича даъвоси қай тартибда кўриб чиқилган?
Очиқлик — ишонч гарови
Жамоатчилик ишончини таъминлаш учун бундай масалаларда очиқ ва асосли жавоблар жуда муҳим.
Эффеcт.уз мазкур ҳолат юзасидан барча томонларнинг позициясини ёритишга тайёр ва тегишли идораларнинг расмий муносабатини кутади.
Суриштирув давом этади. Эффеcт.узни кузатишда давом этинг.
