Турли соҳаларда кўп йиллик самарали меҳнати билан мамлакат тараққиётига ҳисса қўшган фидойи инсонлар давлат томонидан муносиб тақдирланди.
Сурхондарёлик меҳнат фахрийси Абдусаттор Қурбоновнинг чўл ҳудудларини ўзлаштириб, деҳқончиликни ривожлантиришга қўшган ҳиссаси ҳақиқий қаҳрамонлик сифатида эътироф этилди.
Бекобод металлургия комбинатида кўп йиллардан буён пўлат эритувчи бўлиб ишлаб келаётган Ғуломжон Туроновга «Хизмат кўрсатган саноат ходими» фахрий унвони берилди. Бу мукофот металлурглар меҳнатига берилган юксак баҳо сифатида қайд этилди.
Шунингдек, пахтачилик ва ғаллачиликда юқори натижаларга эришиб, ўз мактабини яратган наманганлик Илҳом Зиёвуддинов, ипак қуртини уч мавсум давомида парваришлаб, юқори ҳосил олаётган бухоролик пиллакор Жамила Худойбердиева, чорвачиликда илғор технологияларни жорий этаётган қорақалпоғистонлик Эсенбай Айтимуратов ҳамда сув йўқотишларини камайтиришга ҳисса қўшаётган самарқандлик ирригатор Асланқул Каримқуловнинг хизматлари ҳам муносиб баҳоланди.
Ўзбекистондаги Ислом сивилизацияси маркази ва Самарқанддаги Имом Бухорий мажмуасини безаган уста-наққош Сатторхўжа Тўхтахўжаевга эса “Хизмат кўрсатган қурувчи” фахрий унвони берилди.
Мамлакат етакчиси мукофотларни ўз эгаларига тантанали равишда топширди.
– Кўксингизга ярашиб турган юксак унвон, орден ва медалларга одамлар ҳавас билан қарайди, ёшларимиз сизларга ўхшашга интилади. Бу сизларга келгуси ишларингизда янги куч-ғайрат ва илҳом беради деб ишонаман, – деди давлатимиз раҳбари маросим якунида.
