9–16-август кунлари Тошкентда ўтказилган Халқаро информатика олимпиадаси (ИОИ) атрофида можаро юзага келди.

Маълум қилинишича, 17 ёшли исроиллик иштирокчи Ётам Будник мусобақа натижаларига кўра олтин медални қўлга киритган. Бироқ тақдирлаш маросимида Исроил байроғини намойиш қилганидан кейин унинг натижаси бекор қилинган ва исми расмий рейтингдан олиб ташланган.

Будник ва бошқа исроиллик иштирокчилар мусобақада мамлакат номи ва байроғисиз, мустақил иштирокчилар сифатида қатнашган. Шунга қарамай, Будник тақдирлаш маросимига Исроил байроғини олиб чиққан.

У подиумга кўтарилганидан сўнг байроқни очиб, елкасига ташлаган. Хабарларга кўра, иштирокчи бу ҳаракат мусобақа қоидаларига зид эканини билганини ҳам тан олган.

Шундан кейин ташкилотчилар ундан олтин медални қайтаришни сўраган. Будник эса медални топширишдан бош тортган.

Кейинчалик унинг натижаси расмий рейтингдан чиқарилган ва кўрсаткичи ўчирилган. Натижада Будник айни вақтда Халқаро информатика олимпиадасининг расмий рейтингларида олтин медал соҳиби сифатида қайд этилмаяпти.

Ҳодиса олимпиадада спорт ёки интеллектуал натижа билан бир қаторда иштирокчиларнинг миллий рамзлардан фойдаланиши масаласини ҳам кун тартибига олиб чиқди.