АҚШ вице-президенти Жей Ди Венс Исроил бош вазири Бинямин Нетаняху билан ўтказган телефон мулоқоти “кескин” руҳда ўтгани хабар қилинмоқда. Манбаларга кўра, томонлар Эрон билан боғлиқ можарони ҳал этиш борасида қарама-қарши позицияда.

Хабарларда айтилишича, Венс можарони музокаралар орқали якунлаш тарафдори бўлса, Нетаняху Эрондаги амалдаги режимни тўлиқ йўқ қилиш ғоясини илгари сурмоқда.

Ироқ уруши ветерани бўлган Венс аввалдан АҚШ армиясининг хориждаги можароларда иштирок этишига эҳтиёткорлик билан ёндашиши билан танилган.

У аввалроқ Вашингтон ташқи сиёсатда “ўтмиш хатоларини такрорламаслик” кераклигини таъкидлаган эди. Шу билан бирга, у можаро бошланишига фақат “тез ва кучли зарба” орқали қисқа муддатда натижага эришиш шарти билан розилик бергани қайд этилмоқда. Бироқ, кутилганидан фарқли равишда, Эрон томони қаршилик кўрсатишда давом этмоқда.

Венс Нетаняҳунинг айрим башоратларини ортиқча деб баҳолаган, хусусан, Эронда оммавий қўзғолон орқали ҳокимият алмашиши эҳтимоли ҳақидаги фикрларга шубҳа билдирган.

“Урушдан олдин Нетаняху вазиятни осон ва тез ҳал бўладигандек кўрсатган. Вице-президент эса бу баёнотларга ҳиссиёциз, реал ёндашув асосида қайта баҳо берди”, — дейди манбалардан бири.

Шу билан бирга, Венс БАА ва Қатар делегациялари билан ҳам музокаралар ўтказгани, шунингдек, Эрон билан билвосита мулоқотларда иштирок этаётгани айтилмоқда. Бу ҳаракатлар АҚШ маъмурияти урушни имкони қадар тез якунлаш ниятида эканини кўрсатишга қаратилган.

Аммо Саудия Арабистони Исроил каби ҳарбий ҳаракатларни давом эттириш тарафдори бўлиб қолмоқда.

Айни пайтда, АҚШ президенти Доналд Трамп ҳукумат йиғилишида Венсдан уруш бўйича янгиланган маълумот беришни сўраган ва ундан музокаралар жараёнида фаол қатнашишни сўраган.