Ўзбекистон футбол ассоциациясида Литвада бўлиб ўтган Жаҳон Чемпионатида муваффақиятли иштирок этган Ўзбекистон миллий терма жамоаси футзалчилари билан учрашув бўлиб ўтди.

Унда ЎФА биринчи вице-президенти Равшан Эрматов, футзал делегацияси раҳбари Жаҳонгир Усмонов ҳамда ассоциация бош котиби Аваз Максумов иштирок этишди.

Равшан Эрматов футзалчиларни ЎФА президенти Абдусалом Азизов номидан, қолаверса, бутун футбол жамоатчилиги номидан мундиалда қайд этилган тарихий натижа билан табриклади. Ушбу натижанинг ортида катта саи-ҳаракатлар ва жамоавий меҳнат ётганини таъкидлаб ўтди.

Футзалчилармиз йил бошидан бери Таиланд, Испания ва Португалияда йиғинлар ўтказди, ўз қитъасида етакчи ҳисобланган ва жаҳонда ўз ўрнига эга бўлган Аргентина, Испания, Португалия, Эрон ва Венесуела каби жамоалар билан ўртоқлик учрашувлари ўтказишди.

Терма жамоанинг Жаҳон Чемпионатига етарлича тайёргарлик кўриши учун керакли барча шароитлар тақдим этилди.

Футзал терма жамоамизнинг анча ёш бўлганлиги сабабли кейинги мусобақаларда янада юқори натижалар қайд этишларига ишонч билдирилди.

Ўз навбатида, жамоа номидан терма жамоа сардори Рустам Умаров ЎФАга эътибор учун миннатдорчилик билдирган ҳолда ассоциация музейига эсдалик совғасини топширди. Тадбир якунида футзалчилар пул мукофотлари билан тақдирландилар.