Навоий вилоятининг иккита ҳудудида ер сотиш билан боғлиқ фирибгарлик ҳолатлари аниқланди. Бу ҳақида прократура департаменти матбуот хизмати хабар бермоқда.

Бош прокуратура ҳузуридаги Департамент ҳамда ДХХнинг Навоий вилояти бошқармалари томонидан ўтказилган тезкор тадбирда, Навоий шаҳарда истиқомат қилувчи фуқаро Ш.Э. бошқа бир фуқаро Ж.нинг ишончига кириб, унга 20 000 АҚШ доллари эвазига танишлари орқали Конимех тумани ҳудудида тадбиркорлик фаолиятини амалга ошириш учун 1 гектар ер майдони олиб беришни ваъда қилиб, олдиндан 1 000 АҚШ долларини олган вақтида ашёвий далиллар билан ушланган.

Худди шундай, Навбаҳор туманидаги “Ш.С.” фермер хўжалиги раҳбари М.Ш. фуқаро Б.га хўжаликка тегишли бўлган 6 гектар ер майдонини 90 млн сўм эвазига танишлари орқали унинг номига ўтказиб беришни  ваъда қилиб,  шундан 50 млн сўмни олган вақтида Департамент ҳамда ДХХ ходимлари томонидан қўлга олинган.

Мазкур ҳолатлар юзасидан Жиноят кодексининг 168-моддаси (фирибгарлик) 28, 211-моддаси (пора бериш) билан жиноят ишлари қўзғатилиб, тергов ҳаракатлари ўтказилмоқда.

Ҳурматли фуқаролар ва тадбиркорлар!

Ўзбекистон Республикаси Президентининг 2021 йил 8 июндаги “Ер муносабатларида тенглик ва шаффофликни таъминлаш, ерга бўлган ҳуқуқларни ишончли ҳимоя қилиш ва уларни бозор активига айлантириш чора-тадбирлари тўғрисида”ги ПФ-6243-сон Фармонига асосан қишлоқ хўжалигига мўлжалланган ерлар очиқ электрон танлов якунларига кўра, фақат ижара ҳуқуқи асосида ажратилади, қишлоқ хўжалигига мўлжалланмаган ерлар мулк ҳуқуқи ва ижара ҳуқуқи асосида электрон онлайн-аукцион орқали реализация қилинади.

Ер майдонлари олишда очиқ ва шаффоф тамойиллар асосида ҳаракат қилишингизни, фирибгарлар тузоғидан эҳтиёт бўлишингизни сўраб қоламиз.

Добавить комментарий

Ваш адрес email не будет опубликован. Обязательные поля помечены *