O'zbekiston prezidenti Shavkat Mirziyoev 16 iyunь kungi videoselektor yig'ilishida yurtimizda koronavirusga chalinganlar soni so'nggi ikki haftada keskin oshgani haqida to'xtalib o'tdi.

Jumladan, shu davrda birgina Toshkent shahrida aniqlangan 551 nafar holatdan 482 nafari aholi orasidan aniqlangani, shundan 57 ta holatda yuqish manbai noma'lum bo'lib qolayotgani kasallikni yuqtirib olish xavfi yuqori ekanini ko'rsatmoqda.

Avval xabar qilganimizdek, 15 iyunь sanasida yurtimizda koronavirus infeksiyasi tasdiqlangan 183 nafar bemorning 29 nafari aholi orasida aniqlangan bo'lsa, 16 iyunь kuni esa koronavirus qayd etilgan 230 nafar bemordan 20 nafari aholi orasida tasdiqlandi. Ikki kunlik ma'lumotga ko'ra, umumiy kasallanish ko'rsatkichi ancha oshgan, aholi orasida koronavirusga chalinish holati esa birmuncha kamaygan.

16 iyunь kuni aholi orasida koronavirus aniqlanish holatlarini hududlar kesimida ko'radigan bo'lsak,

Toshkent shahrida 14 nafar,

Buxoro viloyatida 3 nafar,

Samarqand viloyatida 2 nafar,

Namangan viloyatida esa 1 nafarni tashkil etdi.

Jumladan, Toshkent shahri Olmazor tumanida yashovchi oilaning 3 nafar a'zosida (dam olish hududiga hordiq chiqarish uchun oilaviy borishgan, bir kun o'tib, tana harorati ko'tarilgach, tahlil topshirishgan), shu tumanda yashovchi yana uch nafar fuqaroda: Uchtepa tumanidagi tikuvchilik sexi ishchisida, ishga joylashish uchun namuna toshirgan shaxsda hamda tana harorati ko'tarilgani sababli poliklinikaga murojaat qilgan fuqaroda kasallik qayd etilgan.

Bundan tashqari, “Malika” savdo majmuasi sotuvchisida (ishga chiqish uchun namuna topshirgan), Yunusobod tumanida yashovchi homilador ayolda (shifoxonaga yotish uchun namuna topshirgan), Sergeli tumanida yashovchi vaqtincha ishsiz fuqaro (tana harorati ko'tarilgach, uy sharoitida shifokorga murojaat qilmasdan davolangan) va uning 4 nafar oila a'zosida, respublika ixtisoslashtirilgan onkologiya va tibbiy radiologiya ilmiy-amaliy tibbiyot markazida davolanish uchun namuna topshirgan fuqaroda infeksiya aniqlangan.

Shuningdek, Samarqand tumanida yashovchi nafaqadagi bemorda (onkologiya kasalligi sababli shifoxonaga yotish uchun namuna topshirgan), Samarqand shahridagi 24-maktab farroshi (ko'krak bezi kasalligi bo'yicha namuna topshirgan), Buxoro viloyati Shofirkon tumanida yashovchi haydovchida ham kasallik tasdiqlangan.

Ushbu holatlardan kelib chiqqan holda davlatimiz rahbari ham koronavirus bilan bog'liq vaziyat tobora murakkab tus olib borayotganiga alohida e'tibor qaratib: “Bugun pandemiyaga qarshi kurashda xushyorlik va mas'uliyatni bir karra emas, o'n karra oshiradigan yangi bosqich boshlanmoqda, desak to'g'ri bo'ladi”, deya alohida ta'kidlab o'tdilar.