Turkiy tilli xalqlarning taniqli sanʼatkorlari Hulkar Abdullayevaning “Paqa-paq” qoʻshigʻini Zoom orqali birgalikda ijro etdi

“Xiva – 2020-yilda turkiy dunyoning madaniyat poytaxti” deb eʼlon qilingani munosabati bilan turkiy tilli davlatlarning taniqli sanʼatkorlari xonanda Hulkar Abdullayevaning “Paqa-paq” qoʻshigʻini birgalikda ijro etdi. Bu haqda madaniyat vaziri Ozodbek Nazarbekov xabar berdi.

Qozogʻiston, Qirgʻiziston, Tatariston, Turkmaniston, Turkiya, Qrim, Moldova, Kabarda-Balkariya, Oʻzbekiston sanʼatkorlari Zoom orqali bir joyga toʻplanib, Hulkar Abdullayevaga joʻr boʻlib, “Paqa-paq” qoʻshigʻini kuylagan.

«Koʻhna Xiva yurtimizga xorijlik sayyohlarni eng koʻp jalb etuvchi qadimiy shaharlardan biri. Xorazm zaminining goʻzal va navqiron bu goʻshasi 2020-yilda turk dunyosi madaniyati poytaxti maqomiga sazovor boʻldi. Bu bizlar uchun faxr va iftixor tuygʻusidir.

Moziy sahnasida ne-ne istilolarga boʻyin egmagan Xiva, hamon serviqor koʻrinishini yoʻqotmagan va uning dovrugʻi butun dunyoga tarqalmoqda.

ʻXiva – 2020-yilda turkiy dunyoning madaniyat poytaxtiʻ deb eʼlon qilingani munosabati bilan barcha qardosh turkiy xalqlarning taniqli sanʼatkorlari birgalikda qoʻshiq kuylashdi.

Bugungi sinovli kunlarda ijro etilgan ushbu qoʻshiq dunyo xalqlarini qalban yana-da yaqinlashtiradi», — deb yozadi Ozodbek Nazarbekov.